طول عمري عاوز أعمل حاجة تخلّي حياة الناس أحسن.
شفت ناس بتتعب وبتجتهد ومش بتاخد حقها. ومقتنع تمامًا إن قوة الناس كبيرة جدًا، لو آمنت بده. فكرت في تطبيق الناس هي اللي بتبنيه وبتدعمه، وبيستفيدوا فيه من بعض.
مقتنع إن مفيش حاجة أهم ولا أذكى من البشر، حتى لو كمبيوتر أو جوجل أو ذكاء اصطناعي. كل ده تقليد لمعرفة بشرية اتكوّنت على مدار آلاف السنين. فقلت أعمل تطبيق بنفس منطق الذكاء الاصطناعي: تدخل وتسأل، ويجاوبك ناس زيك عدّوا بنفس التجربة اللي بتسأل عنها.
مش لازم تمشي الطريق لآخره عشان تكتشف إن غيرك وصله قبلك. وما خاب من استشار. أي قرار مهم لازم تستشير فيه. ومش أحسن حاجة تروح مكان عشان بس عملوا دعاية، وممكن مالهاش علاقة بجودة المكان. ولو عايش في مكان مفيهوش رقابة على الأسعار والجودة، هنا تقدر أنت وغيرك تلمّعوا الأماكن الكويسة والمحترمة اللي عاوزة تقدّم خدمة كويسة.
عاوز تشوفها زكاة علم؟ ماشي. عاوز تقول إن رأيك يستاهل؟ ماشي. المهم إنك بتعمل حاجة هتفرق مع غيرك. معلومة واحدة ممكن تغيّر حياة شخص.
هدفي إننا نبطّل ننتقد ونشتكي إن الظروف والدنيا مش كويسة. لأن ببساطة، لو كل الناس الكويسة بطّلت تقدّم حاجة كويسة، الوحش هو اللي هيسيطر.
قلت في التطبيق ده كل صاحب خبرة يدخل يجاوب ويفيد الناس، ومع الوقت قيمته وموثوقيته تزيد، فيبقى كل شخص عنده قيمة يقدّمها في المكان اللي يستحقه.
عاوز تجرّب التطبيق؟ تعالى، وابني معايا الفكرة.